[index]
1 Corinthiaid 13
Ydw, dw i am ddangos ffordd well fyth i chi.
1 Petawn i’n siarad ieithoedd dieithr neu hyd yn oed iaith angylion, heb
gariad dw i'n ddim byd ond darn o fetal swnllyd neu symbal yn diasbedain.
2 Efallai fod gen i'r ddawn i broffwydo, a’r gallu i blymio'r dirgelion dyfnaf
– neu’r wybodaeth i esbonio popeth! Efallai fod gen i ddigon o ffydd
i ‘symud mynyddoedd’ – ond heb gariad dw i'n dda i ddim.
3 Efallai mod i’n fodlon rhannu’r cwbl sydd gen i gyda'r tlodion, neu
hyd yn oed yn fodlon marw dros y ffydd – ond heb gariad, waeth i mi heb.
4 Mae cariad yn amyneddgar. Mae cariad yn garedig. Dydy cariad ddim yn cenfigennu,
ddim yn ymffrostio, nac yn llawn ohono’i hun chwaith.
5 Dydy cariad ddim yn gwneud pethau anweddus, nag yn mynnu ei ffordd ei hun drwy’r
adeg. Dydy e ddim yn digio a phwdu, ac mae’n fodlon anghofio pan mae rhywun
wedi gwneud cam.
6 Dydy cariad ddim yn mwynhau gweld anghyfiawnder – beth sy’n ei wneud
yn llawen ydy’r gwir.
7 Mae cariad bob amser yn amddiffyn, mae bob amser yn credu, bob amser yn gobeithio,
bob amser yn dal ati.
8 Fydd cariad byth yn dod i ben. Mae proffwydoliaethau’n mynd i ddiflannu;
y tafodau sy'n siarad ieithoedd dieithr yn mynd i dewi; a fydd dim angen geiriau
o wybodaeth.
9 Oherwydd ychydig dyn ni’n ei wybod a dydy'n proffwydo ni ddim wedi datguddio'r
cwbl i ni chwaith!
10 Pan fydd beth sy’n gyflawn ac yn berffaith yn dod yn derfynol, bydd y
doniau sydd ond yn rhoi cipolwg rhannol i ni yn cael eu hysgubo o’r neilltu.
11 Pan oeddwn i'n blentyn, roeddwn i'n siarad iaith plentyn, yn meddwl fel plentyn,
a deall plentyn oedd gen i. Ond ers i mi dyfu’n oedolyn dw i wedi stopio
ymddwyn fel plentyn.
12 A dyna sut mae hi – dyn ni ond yn gweld rhyw adlewyrchiad digon tila mewn
drych metel ar hyn o bryd; ond bydd popeth yn hollol glir i ni maes o law. Ychydig
iawn dyn ni'n ei wybod ar hyn o bryd; ond bydda i’n cael gwybod y cwbl bryd
hynny, yn union fel y mae Duw yn gwybod y cwbl amdana i.
13 Ar hyn o bryd mae gynnoch chi dri peth sy’n aros: ffydd, gobaith a chariad.
Ond y mwya ohonyn nhw ydy cariad.
[index]