[index]

aragonais - aragonés


Declarazión unibersal d'os dreitos umanos


Considerando que a reconoxedura d'a dinnidá intrinseca y d'os dreitos iguals y inallenables de toz os miembros d'a familia umana ye l'alazet d'a libertá, a chustizia y a paz en o mundo,
Considerando que a innoranzia y o disprezio d'os dreitos umanos han orixinato autos de barbarie que han altroxato a conzenzia d'a umanidá, y que ye proclamata, como l'aspirazión más altera de l'ombre, l'abenimiento d'un mundo en o cualo los sers umanos espleiten d'a libertá d'esprisión y de creyenzias, libres de toda medrana,
Considerando que ye esenzial que os dreitos umanos sigan protexitos por o mandato d'a lai, ta que l'ombre no se beiga forzato a recorrir, como zaguer recurso, a la rebelión contra la tiranía y a opresión,
Considerando que ye esenzial promober o desembolique d'as rilazions amistosas entre as nazions,
Considerando que os pueblos d'as Nazions Unitas han refirmau en a Carta la suya fe en os dreitos alazetals de l'ombre, en a dinnidá y balura d'a presona umana y en a igualdá de dreitos entre ombres y mullers, y han dezidito promober o pogreso sozial y un millor lebel de bida drento d'una mayor libertá,
Considerando que os Estatos Miembros s'han embrecato a asigurar, en coperazión con as Nazions Unitas, l'unibersal y efeutibo rispeto y cumplimiento d'os dreitos y libertaz alazetals de l'ombre,
Considerando que una conzeuzión común d'istos dreitos y libertaz ye d'a mayor importanzia ta o pleno cumplimiento d'ista embrecadura,
L'ASAMBLEYA CHENERAL proclama
ista DECLARAZIÓN UNIBERSAL D'OS DREITOS UMANOS como ideyal común a alcanzar por toz os pueblos y todas as nazions, a fin de que toz os indibiduos y todas as istituzions, con ella cutio en o esmo, promueban por meyo de l'amostranza y a educazión, o rispeto ta istos dreitos y libertaz, y asiguren a suya reconoxedura y cumplimiento de traza unibersal y efeutiba con midas pogresibas a ran nazional y internazional, tanto entre os pueblos d'os Estatos Miembros como entre os d'os territorios baxo a suya churisdizión.

1
Toz os sers umanos naxen libres y iguals en dinnidá y dreitos. Adotatos de razón y conzenzia, deben comportar-sen fraternalmén unos con atros.

2
Toda presona tiene toz os dreitos y libertaz proclamatos en ista Declarazión, sin garra distinzión de raza, color, secso, fabla, relixión, opinión politica u de cualsiquier atra mena, orixen nazional u sozial, posizión economica, naxedura u cualsiquier atra condizión.
Antiparti, no se ferá garra distinzión alazetata en a condizión politica, churidica u internazional d'o país u territorio a o cualo una presona pertenexca, ya siga independién, u siga baxo almenistrazión fuduziaria, no autonomo u baxo cualsiquier atra amugadura de sobiranía.

3
Toda presona tienen dreito a la bida, a la libertá y a la siguridá d'a suya presona.

4
Dengún no estará chusmeso a esclabitú ni a serbidumbre; a esclabitú y a trata d'esclaus estarán proyibitas en todas as suyas formas.

5
Dengún no endurará torturas ni tratos u penas cruels, inumanos u degradans.

6
Toz tienen dreito a que se reconoxca la suya presonalidá churidica en cualsiquier parti.

7
Toz son iguals debán d'a lai y tienen dreito a la suya proteuzión, sin discriminazión denguna. Toz tienen dreito a igual proteuzión contra cualsiquier discriminazión que infrinxa ista Declarazión y contra toda prebocazión a tal discriminazión.

8
Toz tienen dreito a un recurso efeutibo, debán d'os tribunals nazionals competens, contra os autos que biolen os suyos dreitos alazetals reconoxitos por a costituzión u por a lai.

9
Dengún no podrá estar albitrariamén aturato, preso u chitato de tierra.

10
Toda presona tiene dreito a estar ascuitata publicamén y con chustizia, en condizions de plena igualdá, por un tribunal independién y imparzial ta la determinazión d'os suyos dreitos y obligazions u ta o desamen de cualsiquier acusazión penal contra ella.

11
Toda presona acusata d'un delito tiene dreito a que se presuma la suya inozenzia mientres no se prebe que ye culpable, conformes a lai y en chuizio publico, en o cualo cal que tienga todas as guaranzias nezesarias ta la suya esfensa.
Dengún no estará condenato por autos u omisions que en l'inte d'estar cometitos no estasen delitibos senguntes o Dreito nazional u internazional.

12
Dengún no estará ocheto d'incherenzias albitrarias en a suya bida pribada, familia, domizilio u correspondenzia, ni d'ataques a la suya onra u reputazión. Toda presona tiene dreito a la protezión d'a lai contra tals incherenzias u ataques.

13
Toz tienen dreito a zircular y fixar libremén a suya residenzia drento d'as mugas d'un Estato.
Toz tienen dreito a marchar d'un país, mesmo lo propio, y a tornar-ie.

14
Toz tienen dreito, en caso de persecuzión, a demandar asilo y esfrutar d'él en cualsiquier país.
Iste dreito no podrá estar imbocato en caso d'una azión chudizial chustamén orixinada por delitos no politicos u por autos contrarios a os propositos d'as Nazions Unitas.

15
Toda presona tiene dreito a una nazionalidá.
A dengún no le se pribarará albitrariamén d'a suya nazionalidá ni d'o dreito a cambear-la.

16
Os ombres y as mullers, a partir d'a edá núbil, tienen dreito, sin garra restrizión por raza, nazionalidá y relixión, a casar-se y establir una familia. Os dos tendrán os mesmos dreitos en contrayer matrimonio, mientres iste dure y en caso d'a suya rematadura.
Nomás podrá contrayer-se matrimonio que por o libre y pleno consentimiento d'os futuros esposos.
A familia ye a unidá natural y alazetal d'a soziedá y tiene dreito a la suya protezión por parti d'a soziedá y de l'Estato.

17
Toz tienen dreito a la propiedá, tanto indibidualmén como en asoziazión con atros.
Dengún no estará pribato albitrariamén d'a suya propiedá.

18
Toz tienen dreito a la libertá de pensamiento, de conzenzia y de relixión; iste dreito incluye a libertá de cambear de relixión u de creyenzia y a libertá de manifestar-la, indibidual u coleutibamén, en publico u en pribato, por meyo de l'amostranza, a prautica, o culto y a oserbanzia.

19 Toz tienen dreito a la libertá d'opinión y esprisión; iste dreito incluye o de no estar inquestato por as suyas opinions, o de rechirar, recullir y espardir-ne informazions, sin limitazions de mugas y a trabiés de cualsiquier meyo d'esprisión.

20
Toz tienen dreito a la libertá de riunión y d'asoziazión pazificas.
Dengún no podrá estar obligato a pertenexer a garra asoziazión.

21
Toz tienen o dreito a partizipar en o gubierno d'o suyo país, dreitamén u a trabiés de ripresentans libremén eslexitos.
Toz tienen dreito a azeder a la funzión publica en o suyo país en condizions d'igualdá.
A boluntá d'o pueblo ye l'alazet de l'autoridá d'os poders publicos; ista boluntá estará esprisata por meyo d'eslezions autenticas y periodicas, zilebratas por sufraxio igual y unibersal y por boto secreto u atro prezedimiento equibalén que guaranzie a libertá de boto.

22
Toz, como miembros d'a soziedá, tienen dreito a la siguridá sozial y a otener por meyo d'a esmaxinada nazional y a coperazión internazional, y seguntes a organizazión y recursos de cadas Estato, a plena satisfazión d'os dreitos economicos, sozials y culturals indispensables ta la suya dinnidá y ta o libre desembolique d'a suya presonalidá.

23
Toz tienen dreito a o triballo, a la libre eslezión d'a suya ocupazión, a condizions de triballo chustas y satisfautorias y a la protezión contra l'esquefer.
Toz, sin garra discriminazión, tienen dreito a igual salario por igual triballo.
Toda presona que triballa tiene o dreito a una remunerazión equitatiba y satisfautoria que l'asigure, a ella y a la suya familia, una esistenzia que faiga onra a la dinnidá umana y que estará complementata, si cal, por cualsiquier atro meyo de protezión sozial.
Toz tienen dreito a fundar un sindicato y a sindicar-sen ta protexer os suyos intreses.

24
Toz tienen dreito a o discanso y a espleitar de l'ozio, incluyindo una limitazión razonable d'as oras de triballo y bacanzias periodicas bosadas.

25
Toz tienen dreito a un lebel de bida adecuato, que asigure a suya salú y o suyo buenpasar y o d'a suya familia, incluyindo l'alimentazión, o bestito, a bibienda, l'asistenzia medica y os serbizios sozials nezesarios; y tamién o dreito a un siguro en caso d'esquefer, malotía, imbalidura, biudez, biellera u atros casos de perda d'os suyos meyos de susistenzia en zercustanzias allenas a la suya boluntá.
A maternidá y a infanzia tienen dreito a cudiatos espezials. Toz os ninos, naxitos drento u difuera d'o matrimonio, tiene dreito a la mesma protezión sozial.

26
Toda presona tiene dreito a la educazión. A educazión estará gratuita, por o menos en o ran alazetal, en que estará obligatoria. A educazión teunica y profesional estará cheneralizata; l'azeso a la educazión superior estará igual ta toz, en alcordanza con os suyos meritos.
A educazión estará endrezata enta o pleno desembolique d'a presonalidá umana y l'enfortimiento d'o rispeto a os dreitos umanos y as libertaz alazetals; promoberá la comprensión, a toleranzia y l'amistá entre todas as nazions y toz os grupos etnicos u relixiosos, asinas como as autibidaz d'as Nazions Unitas ta o mantenimiento d'a paz.
Os pais tendrán dreito preferén ta eslexir a mena d'educazión que abrá de dar-se a os suyos fillos.

27
Toz tienen dreito a partizipar libremén en a bida cultural d'a comunidá, a espleitar d'as artes y a compartir o pogreso zientifico y os suyos benefizios.
Toda presona tienen dreito a la protezión d'os intreses morals y materials que le pertoquen por cualsiquier produzión zientifica, literaria u artistica d'a que siga autor.

28
Toz tienen dreito a un orden sozial y internazional en o que os dreitos y libertaz proclamatos en ista Declarazión se faigan plenamén efeutibos.

29
Toda presona tiene debers enta la comunidá, pos sólo que en ella puede desembolicar libre y plenamén a suya presonalidá.
En l'exerzizio d'os suyos dreitos y libertaz, toda presona estará sucheta nomás que a las amugaduras establitas por a lai con a unica fin d'asigurar a reconoxedura y o rispeto d'os dreitos y libertaz d'os otris y de satisfer as chustas desixenzias d'a moralidá, l'orden publico y o buenpasar cheneral d'una soziedá democratica.
Istos dreitos y libertaz no podrán pas exerzer-sen en dengún caso en contras d'os propositos y prenzipios d'as Nazions Unitas.

30
Garra cosa d'ista Declarazión podrá interpretar-se en o sentito de que confiera dengún dreito a l'Estato, a una colla u a una presona, ta prenzipiar u desembolicar autos endrezatos ta la supresión de cualsiquiera d'os dreitos y libertaz astí proclamatos.
[index]